पोखराको मेयरमा कांग्रेसका नेता ऋषि सापकोटाले पनि दिए उम्मेदवारी
१२ वैशाख, पोखरा । पोखरा महानगरपालिका प्रमुखमा नेपाली कांग्रेसका जिल्ला नेता ऋषि सापकोटाले स्वतन्त्र रुपमा उम्मेदवारी दिएका छन् ।
गठबन्धनका नाममा पोखराका मतदातालाई अन्य पार्टीको चुनाव चिह्नमा मत दिन बाध्य पारेकाले आफूले उम्मेदवारी दिएको सापकोटाले बताएका छन् । सत्तारुढ गठबन्धनले उम्मेदवारी भागवण्डा गर्दा पोखरा महानगरपालिकाको मेयर एकीकृत समाजवादीलाई परेको छ ।
सापकोटा नेपाली कांग्रेसको कास्की जिल्ला समितिको पूर्वकोषाध्यक्ष हुन् । उनी २०५४ सालदेखि ०६४ सालसम्म पार्टीको जिल्ला समितिको कोषाध्यक्ष थिए । हाल उनी पार्टीको क्रियाशील सदस्य छन् ।
यसअघि कांग्रेसका नेता विमल कार्कीले पनि मेयरमा स्वतन्त्र उम्मेदवारी दिएका छन् । पोखराको मेयरमा नेकपा एकीकृत समाजवादीले धनराज आचार्यलाई उम्मेदवार बनाएको छ ।
आइतबारमात्रै पोखराको मेयर आफूहरुले पाउनुपर्ने भन्दै पोखराका नेता, कार्यकर्ताले जिल्ला सभापतिसहितका टोलीलाई पार्टी कार्यालयमै ५ घन्टा थुनेका थिए । अन्तिममा सभापतिले पोखराको मेयरबाहेक अन्य पालिकामा गठबन्धन नगर्ने निर्णय गरेको जानकारी दिएपछिमात्रै तालाबन्दी खुलेको थियो ।
