उपनिर्वाचनमा सेना परिचालन हुने

उपनिर्वाचनमा सेना परिचालन हुने

१५ कार्तिक (काठमाण्डौ)
आगामी मंसिर १४ गते हुने उपनिर्वाचनमा नेपाली सेना पनि परिचालन गरिने भएको छ। गृहमन्त्रालयले सेनासहितको एकीकृत सुरक्षा योजना तयार पारेको हो ।
शुक्रबार गृहमन्त्री रामबहादुर थापाको उपस्थितमा उपनिर्वाचनको सुरक्षासम्बन्धी कार्ययोजनामा छलफल भएको छ। चुस्त सुरक्षा व्यवस्था रहनेगरी संवेदनशीलताका आधारमा निर्वाचन केन्द्रहरुलाई विभाजन गरेर कार्यायोजना बनाइएको गृह मन्त्रालयले जनाएको छ ।
बैठकमा उपनिर्वाचनका लागि तयार पारिएको केन्द्रीय सुरक्षा कार्ययोजना प्रस्तुतीकरण गरिएको थियो। कार्ययोजनामा नेपाली सेना, नेपाल प्रहरी, सशस्त्र प्रहरी, राष्ट्रिय अनुसन्धान विभागका सुरक्षाकर्मीको एकीकृत परिचालनको खाका तयार पारिएको छ।
बैठकमा गृहमन्त्री रामबहादुर थापा, गृहसचिव प्रेमकुमार राई, नेपाल प्रहरीका महानिरीक्षक सर्वेन्द्र खनाल, सशस्त्र प्रहरी बलका महानिरीक्षक शैलेन्द्र खनाल, राष्ट्रिय अनुसन्धान विभागका प्रमुख गणेश अधिकारी, नेपाली सेनाका रथी गौरव तण्डुललगायत सहभागी थिए ।
बैठकमा गृहमन्त्री थापाले सुरक्षा कार्ययोजना राम्रो बनेको भन्दै सुरक्षा संवेदनशीलता र विगतको निर्वाचनका अनुभव आधारमा आवश्यकताअनुसार कार्ययोजनालाई थप परिस्कृत गर्दै लैजान निर्देशन दिए। उनले निर्वाचनलाई स्वच्छ, स्वस्थ, शान्तिपूर्ण र भयरहित वातावरणमा सञ्चालन गर्न आवश्यक सबै तयारी गर्न समेत सुरक्षा निकायलाई निर्देशन दिएका छन् ।
आगामी मंसिर १४ गते संघीय संसद, प्रदेश सभा र स्थानीय तहको गरी ५२ स्थानमा उपनिर्वाचन हुदै छ ।

Share This
  • 34
  •  
  •  
  •  
  •  
  •  
  •  
  •  
  •  
  •  
    34
    Shares