संक्रमित मृतकको मलामी गएका सम्पर्कमा, टोल सिल गरिदै

२४ जेठ (धनगढी)
धनगढीका स्वास्थ्यकर्मीहरुले शुक्रबार मृत्यु भएर अन्त्येष्टि गरिसकेपछि कोरोना पुष्टि भएकी एक महिलाको मलामी गएकाहरुको पहिचान गरेका छन् । मृतक धनगढी उप–महानगरपालिका ४ को महिमा टोलकी ५५ वर्षीया महिला हुन् ।
जिल्ला प्रहरी कार्यालयका प्रहरी निरिक्षक हिक्मत थापाले महिलाको मलामी गएका ४९ जना सम्पर्कमा आएको बताए । उनका अनुसार धनगढी उप–महानगरपालिका वडा नम्बर ४ सहित घोडाघोडी नगरपालिका वडा नम्बर ३ का ८ जना र बर्दोगोरिया गाउँपालिका वडा नम्बर २ का दुई जना गरी ४९ जना उनको मलामी गएको पाईएको छ ।
मृतकलाई सेती प्रादेशिक अस्पतालसम्म लैजाने तथा उनको शव ल्याउने अटो चालक, आर्यघाटसम्म शव लैजाने ट्रयाक्टर चालक पनि सम्पर्कमा आएका छन् । अहिले मृतकको बसोबास रहेको महिमा टोल सिल गर्ने विषयमा आवश्यक छलफल भईरहेको प्रहरी निरिक्षक थापाले जानकारी दिए। उनी मृगौलाको विरामी थिइन् ।